بدھ , اپریل 24 2019
Home / اہم خبریں / آصف زرداری اور شریف برادران کو نہیں چھوڑینگے، عمران خان
وزیر اعظم عمران خان نے گھوٹکی میں کہا ہے کہ وہ آصف زرداری اور شریف برادران کو نہیں چھوڑینگے
وزیر اعظم عمران خان نے گھوٹکی میں کہا ہے کہ وہ آصف زرداری اور شریف برادران کو نہیں چھوڑینگے

آصف زرداری اور شریف برادران کو نہیں چھوڑینگے، عمران خان

گھوٹکی (رپورٹ: شبیر عاربانی) وزیراعظم عمران خان نے کہا ہےکہ آصف زرداری اور شریف برادران کو نہیں چھوڑینگے. ان کے پاس صرف ایک راستہ ہے یہ قوم کا پیسہ واپس کریں، ورنہ ان کو چیلنج کرتا ہوں جو چاہیں کرلیں ہم ان کو نہیں چھوڑیں گے.

 

 

 

گھوٹکی کی تحصیل خانگڑھ میں جی ڈی اے کے رکن سندہ اسیمبلی علی گوھر مہر کی جانب سے منعقدہ جلسے سے خطاب کرتے ہوئے وزیراعظم عمران خان نے ملائیشیا کے وزیراعظم مہاتیر محمد کی مثال دی اور کہا کہ مہاتیر محمد نے ملائیشیا کو تبدیل اور لوگوں کو خوشحال کیا.

وزیراعظم نے کہا کہ دس سال سے ملک کو بے دردی سے لوٹا گیا. وزیراعظم نے کہا کہ یاد رکھیں قومیں غریب نہیں ہوتیں، کرپشن قوم کو غریب اور مقروض کرتی ہے. ماضی میں ہماری ترقی کی مثال دی جاتی تھی، آج پاکستان تاریخی قرضوں میں ہے، ہمیں قرضوں کی قسطیں ادا کرنے کے لیے قرض لینے پڑتے ہیں. ہر روز قرضوں پر 6 ارب روپے سود دینا پڑتا ہے.

عمران خان کا کہنا تھا کہ پچھلے دس سال میں جس بے دردی سے ملک کو مقروض کیا گیا اس وجہ سے آج ٹوٹل ٹیکس ساڑھے چار ہزار ارب اکٹھا ہوتا ہے، جس میں سے دو ہزار ارب قرض کی قسطوں میں چلا جاتا ہے.

انہوں نے کہا کہ سندھ پاکستان کا سب سے خوشحال صوبہ ہونا چاہیے کیونکہ پاکستان کا فنانشل کیپیٹل کراچی سندھ میں ہے. سب سے زیادہ گیس سندھ سے نکلتی ہے اور یہاں زرخیز زمین ہے. یہاں ملک میں سب سے زیادہ غربت کی وجہ کرپشن ہے، وہ ملک جس میں سب سے زیادہ وسائل ہوں تو وہاں بھی کرپشن ملک کو مقروض کردیتی ہے.

وزیر اعظم عمران خان خانگڑہ، گھوٹکی میں جلسے سے خطاب کرتے ہوئے
وزیر اعظم عمران خان خانگڑہ، گھوٹکی میں جلسے سے خطاب کرتے ہوئے

وزیراعظم کا کہنا تھا کہ وسائل سے مالا مال کانگو آج غریب ترین ملک ہے کیونکہ وہاں کی لیڈر شپ کرپٹ ہے، اس نے وسائل پر قبضہ کیا ہوا ہے، یہی پاکستان اور سندھ کی کہانی ہے. سندھ کی ستر فیصد گیس گھوٹکی سے نکلتی ہے، ڈھائی سو گیس کے کنویں ہیں. وہ ضلع جو سب سے آگے ہونا چاہیے تھا وہ سب سے پیچھے رہ گیا. وزارت خزانہ سے پوچھا تو پتا چلا کہ پچھلے دس سالوں میں سندھ میں گیس کی رائیلٹی 234 ارب آئی ہے.

این ایف سی ایوارڈ میں سب کچھ صوبوں کے پاس چلا گیا سندھ میں عوام کا پیسہ جعلی اکاؤنٹس میں جاتا ہے.انہوں نے کہا کہ سندھ کے لوگوں کو سوال پوچھنا چاہیے کہ گیس کی رائیلٹی میں اتنا پیسہ ملا توگھوٹکی کو اس میں سے کتنا حصہ ملا. یہ کرپشن ہے، تھوڑے سے لوگ وسائل پر قبضہ کرتے ہیں تو باقی عوام غربت میں چلے جاتے ہیں. جو پیسہ عوام پر خرچ ہونا ہوتا ہے وہ لوگوں کی جیبوں میں چلا جاتا ہے. وہ جعلی اکاوئنٹ میں جاتا ہے. منی لانڈرنگ ہوکر ملک سے باہر چلا جاتاہے.

وزیراعظم کا مزید کہنا تھا کہ 2008 میں ملک کا قرضہ چھ ہزار ارب تھا، دس سالوں میں تیس ہزار ارب پر قرض پہنچ گیا. یہ پیسہ کہاں گیاِ؟ قوم کو مقروض کیا گیا. ان لوگوں کا اب احتساب ہورہا ہے تو جمہوریت خطرے میں آگئی. طاقتور کا پاکستان میں کبھی احتساب نہیں ہوا، جب ان پر ہاتھ ڈالا جارہا ہے تو ان کی چوری نہیں جمہوریت خطرے میں آگئی ہے. چوری بچانے کے لیے ٹرین مارچ شروع ہوگیا. جب آپ بجائے قوم کے لیے ٹرین مارچ سے اپنے اربوں روپے کے بینک اکاؤنٹس بچانے کے لیے مارچ کرتے ہیں تو آپ کو دو دو ہزار روپے دے کر لوگوں کو بلانا پڑتا ہے. پھر ان سے بھی کرپشن کرتے ہیں، دو ہزار کی بجائے دو دو سو روپے دیتے ہیں. ان غریبوں سے بھی دھوکا ہوگیا.

عمران خان نے کہا کہ پہلے شریف برادران زرداری اور زرداری شریف برادران کو کرپٹ کہتے تھے، آج دونوں جمہوریت بچانے کے لیے اکٹھے ہونے کی کوشش کررہے ہیں. ان کو چیلنج دیتا ہوں جو مرضی کریں ہم ان کو نہیں چھوڑیں گے. قوم آپ کو معاف نہیں کریگی. صرف ایک راستہ ہے، یہ قوم کا پیسہ واپس کریں، ہم انہیں چھوڑ دیں گے.

وزیراعظم کا کہنا تھا کہ میں سندھ میں صرف شکار کرنے آتا تھا لیکن سیاست میں آکر میرا شکار تبدیل ہوگیا. سندھ کے لوگوں کو یقین دلانا چاہتا ہوں پہلے موقع نہیں ملا، پنجاب میں پاناما کی بہت بڑی جنگ چل رہی تھی، پاناما کے ڈاکوؤں کے خلاف جنگ چل رہی تھی، اس لیے اندرون سندھ آنے کا موقع نہیں ملا. مگر اب اندرون سندھ میں پورا زور لگائیں گے. ووٹ کے لیے سندھ نہیں آئیں گے. سمجھتا ہوں ایک صوبے کو نہیں سارے پاکستان کو اوپر آنا چاہیے.

عمران خان نے کہا کہ اندرون سندھ میں پولیس کو استعمال کیا جاتا ہے اور جھوٹے مقدمات بنواکر مخالفین پر ظلم کرتے ہیں. سندھ میں سب سے زیادہ ظلم کی سیاست ہے. لوگوں کو اتنا خوفزدہ کرتے ہیں کہ لوگ کسی اور کو ووٹ دینے سے ڈرتے ہیں. اس کے خلاف ہماری جنگ ہے سندھ والوں کے ساتھ کھڑا ہوں گا، یہاں مسلسل آتا رہوں گا، ہم نے سندھ کو تبدیل کرنا ہے۔

Check Also

آسٹریلیا نے پاکستان کو 0-5 سے وائٹ واش کردیا

محمد واحد آسٹریلیا نے پاکستان کو 0-5 سے وائٹ واش کردیا. ورلڈکپ سے قبل اہم …